啥叫做台語？這是一個真簡單又閣真複雜的問題！目前佇台灣咧使用的語言主要有台灣客語、台灣南島語（大約十種）、台灣閩南語（台灣福佬話）佮台灣北京語。日據時代（1895-1945），主要 存在的語言是頭前三類（日據時代殖民者的語言日語無算在內）。

彼陣客語被稱做「廣東話」，台灣南島語被稱做「蕃語」或者「高砂族語」，台灣閩南語被稱做「台語」。目前佇台灣所使用的語言按母語人口比例來算差不多是：客語佔12%、南島語佔1%、台語佔74%、台灣北京語佔13%。若廣義來講台語包含台灣客語、南島語、台灣閩南語佮台灣北京語；狹義來講台語是指台灣閩南語（這是約定俗成，毋是政治壓迫的）。因此即個所在所講的台語是指台灣閩南語。

    台語是按啥乜所在來的？敢會是ui3石頭空逼（piak）出來的？是安怎有的人講伊是閩南語？這參漢人四百冬來陸陸續續按福建南部的泉州佮漳州來的有關。因為泉州佮漳州屬閩南，所以in講的話就稱呼做「閩南語」。所以台語是ui3閩南語演變過來的，毋過台語參閩南語毋完全仝款，也就是台語不等於閩南語，閩南語不等於台語。漢人將閩南語（早期無人咧講「閩南語」即個名稱，攏講in講的是「泉州話」、「漳州話」、或者是「廈門話」）帶來台灣已經有三、四百冬囉！佇即個期間受著各種無仝的政權統治，經歷各式各

 樣的語言環境，比如講台灣南島語、荷蘭語、西班牙語、日語、北京語、英語等等語言的影響，佇語音、詞彙佮閩南語有小寡無仝。所以咱講的是台語，毋是閩南語。
    毋過咱嘛愛瞭解台語確實是按閩 南語演變過來的。欲瞭解台語的歷史就愛瞭解閩南語的歷史。閩南語是閩語的一種，閩語是漢語的一種。漢語是漢民族的共同語，因為民族的搬徙、融合、地理環境、社會環境的變化致使漢語演變成七大語言：

官話  吳語  贛語  客語  湘語  閩語  粵語

    其中的官話屬中國北方語系，其他的六種語言屬中國南方語系。每一種語言閣分做幾個方言，比如講閩語會使大約分做五個方言：閩南方言、閩北方言、閩東方言、閩中方言、莆仙方言。
    閩語佇漢語語系內底是語言現象上複雜，內部變異上大的一種語言，佮粵語保存了上濟的古漢語。通行的地區有福建、廣東、台灣佮浙江南部、以及江西、廣州、江蘇的個別地區、另外閣包括按福建、台灣移民東南亞、日本、美洲的僑區，估計使用閩語的人至少有5000 萬人以上，佇世界上伊是排名第24崁的語言。閩南語是閩語內底五種方言當中分佈上闊、使用的人口上濟，是一種超地區、超省界、超國界的一種語言。

一、閩南語的形成  
    閩南語的形成主要是因為三擺的移民潮，移民的原因是征蠻佮避亂：
第一擺：第四世紀晉朝人移居閩→泉州話的形成
    五胡亂華時期（304-439），異族入侵中原，佇西晉永嘉二年（308）的時陣，中原的「衣冠八族」（林黃陳鄭詹丘何胡）開始避難到福建的泉州一帶，in1共上古漢語（比如，有身、新婦、斟酌、鼎、箸、失禮）順sua3帶過來，

後來成做「泉州話」。所以「泉州話」就是第三、四世紀的中原音參「吳楚方言」（比如，水薸（phio5）、手ng2、鱟hia）佮當地的「越語」（比如，loo3（高）、san2（瘦）、lim（飲）、hiu3（灑））濫做伙而成的，這就是「白話音」主要的來源，伊比「讀書音」較早。

第二擺：第七世紀陳政、陳元光父囝屯墾漳州→漳州話的形成
    唐高宗總章二年（669）福建泉州佮廣東潮州之間「蠻獠嘯亂」，朝廷派河南光州固始（即馬的河南省東南角，接近安徽省）人陳政、陳元光父子南下平亂，平亂了後屯兵佇即馬的漳州一帶，即批人帶來七世紀的中古漢語。

第三擺：第九世紀王潮、王審邽、王審知三兄弟統治漳州→漳州話的形成
    唐朝末年，中國發生「黃巢之亂」（878），朝廷派河南固始縣人王潮、王審邽、王審知三兄弟南下平亂，平亂了後王潮被封做福建威武軍節度使。即批人閣帶來九世紀的中原漢語。
    前後即兩批的移民大多數是河南光州固始人，in用固始的方言教福建人讀四書五經，後來成做「漳州話」，這就是「讀書音」主要的來源。伊保存了真濟唐朝人讀冊的音。

二、台語的形成
    明朝的福建是一個海洋時期。因為福建山濟，平地少，人口大量增加，所以歹趁食。足濟閩南人受著生活的壓迫自安爾離開故鄉到外地去討趁。十七世紀荷蘭佮鄭成功殖民台灣是台語發展的關鍵。荷蘭殖民台灣，因為需要人力種作，按泉州、漳州招募真濟人來。佇荷蘭時代台灣漢人差不多就有十萬人。紲落來，鄭成功chua7三萬七千的將士佮眷屬來到台灣。

遮（cia7）的閩南人自然將in的母語帶來台灣。原本滯（tua3）佇台灣的原住民是南島語族，閩南語免不了會透濫著平埔族的南島語，比如，牽手、麻蝨目；荷蘭語，比如，甲，雪文、甲萬（袋子）；西班牙語，比如，三貂角；到1895年日本佔領台灣閣吸引一寡仔日語，比如，便當、料理、驛頭（車站）、起毛誌；1945年國民政府帶來北京語，比如，打招呼（相借問）、火車頭（火車母）、開車（駛車）、加滿（加滇）、透明（通光）、相聲（答喙鼓）、繞口令（盤喙錦）、歇後語（激骨仔話、孽khiat4仔話）、黑面琵鷺（黑面撓杯）、鯨魚（海翁）；1960年代台灣經濟起飛，農產品進出口貿易比例慢慢降低，工業產品超過農產品，佮外國的接觸愈來愈習（ciap8），尤其是美國文化，所以加減嘛受著英語的影響，比如，漢堡、三明治、7-eleven、T-shirt、牛仔褲；參後來本土形成的語詞（比如，正港、稀微、悲情），就成做即馬咱咧講的多層次的「台語」。所以台語佮閩南語已經成做無仝的面貌。咱若畫一個簡單的流變圖就會凍看出台語的源流：

漢語↘
吳語↘  泉州話 ↘              
      →   ＋南島語＋荷蘭話＋西班牙語＋日語＋北京語＋英語→台語
楚語↗  彰州話 ↗
越語↗
咱有當時會聽著人咧鄙相講台語「有音無字」！？

如果台語用漢字才是字，咱只有共伊（kah i7）會一個「失禮」講「是漢字無夠用，是漢字傷頇慢，所以足濟台語音才會找（chue7）無漢字通用。」如果羅馬字是字，安呢百分之一百的台語攏有字。事實上，閩南語對台灣來講是外來語，只有南島語才是本土的語言。安唐山過來所謂的「唐山公」（其實in大多數是越族的後代，毋是純漢人）

嫁予「平埔媽」、搶「平埔媽」的土地、欺侮「平埔媽」後頭厝的人、消滅「平埔媽」佮「平埔公」的語言！！滯佇台灣即塊土地的人百分之九十以上有南島語族的血統，咱是即塊土地原住民的後裔，是即塊土地的主人。
   
 平埔語差不多消失去也，伊有一部分溶入去「唐山公」的語言內底。咱無法度傳承「母語」已經是大不孝，即馬連「父語」都欲放捨，是禽獸不如也！迄首平埔歌佇我的頭殼內咧轉蜇：

      年輕人出來；無論年老或年輕通出來。
      來，大家一齊唱；集合我們的力量。
      不要遺忘這些歌；年老人這樣教悔。
      不要遺忘這些話；年老人這樣吩咐。
      再三再四嘮叨；怎麼還不記牢。
      不要變成漢人，我們的語言該疼惜。
      ……
      你們忘掉番語；哪配得上是番人。
      ……
    要警惕，不要變成漢人！（轉引自劉還月《尋訪台灣平埔族》）
    平埔祖講甲有喙無瀾，囝孫仔共伊當做放風吹。咱的「番語」消失去也！咱也掠準咱攏是原汁的「漢人」，閣顛倒罵家己的祖先是「番」！真是忘恩背祖。
    「母語」無去，只偆「父語」，咱敢通跤步閣踏差？語言是一個族群的族徵，無去就代表即個族群被同化，即個族群自然就消失佇宇宙之中。有志氣的人愛奮發，愛為家己的族語扑拚。咱的語言愛疼惜，咱若袂記咱的語言，咱敢有資格講咱是台灣人？！